ყველასთვის ცნობილია, რომ საქართველოში მოდის ბიზნესი ნამდვილად არ ყვავის,თუმცა ისიც უნდა აღინიშნოს,რომ ბოლო წლებში წინსვლაც შეიმჩნევა. მიუხედავად იმისა, რომ ხშირად გვესმის კრიტიკული ან სარკაზმული მოსაზრებები წელიწადში ოთხი მოდის კვირეულის ჩატარებაზე, (თუმცა  ამჟამად  წელიწადში ორჯერ ტარდება) მიმაჩნია,რომ ეს მაინც წინ გადადგმულ ნაბიჯად უნდა ჩაითვალოს. დღეს მინდა გაგაცნოთ ყველასთვის ცნობილი ქართული მოდის წარმომადგენლები, რომელთა სახელის გაგონებაზე ყველას ახსენდება ჩვენი ქვეყანა – საქართველო. ჩემთვის პირადად საკმაოდ დიდია იმ ადამიანთა სია,რომელიც ქართულ მოდას უკავშირდება,თუმცა შევეცდები გამოვყო ის რამდენიმე,რომელიც არამხოლოდ ქართულ,არამედ მსოფლიო მოდის რიგებში დგას.

           არ შემიძლია არ დავიწყო ყველაზე „ცხელი“ (როგორც ბრიტანულმა გამოცემა „Guardian“ უწოდა), დიზაინერით, რომელმაც ჩემი აზრით შეცვალა თანამედროვე მოდის კურსი, ხედვა, და დაუპირისპირდა მოდის ტრადიციულ გაგებას – დემნა გვასალია. ქართველი მოდის დიზაინერი, რომელიც დაიბადა საბჭოთა კავშირის საქართველოში, სწავლობდა თბილისის სახელმწიფო უნივერსიტეტში და მოგვიანებით, ანტვერპის სამეფო აკადემიაში ხელოვნების ფაკულტეტზე. ხელმძღვანელობდა Mason Margiela-სა და Louis Vuitton-ის გუნდებს. ამჟამად არის Balenciaga-ს შემოქმედებითი დირექტორი და VETEMENTS მთავარი დიზაინერი.დემნას ერთადერთი შთაგონების წყარო იყო მისი ბებია. მოზარდობის ასაკში დემნა იძულებული იყო ხშირად შეეცვალა საცხოვრებელი გარემო მამამისის სამუშაოს გამო, საბოლოოდ კი აღმოჩნდა ლონდონში, შემდეგ კი გერმანიაში. თავისი სტილის საპოვნელად დემნას საკმაო დრო დასჭირდა. Vetements მოჰყვა სწრაფი გამოხმაურება, ის იყო დამანგრეველი და მარგინალური, ამ მოდის ხაზმა, მიუხედავად იმისა, რომ დემნას არ გაუკეთებია ასეთი განცხადება, დაანგრია ტრადიციული მოდის კოდები.

             შემდეგი არის დავიდ კომა, იგივე დავით კომახიძე, რომელიც 1981 წელს თბილისში დაიბადა. ბავშვობა საქართველოში გაატარა. 8 წლისამ ქალის ტანსაცმლის ესკიზების ხატვა დაიწყო. როცა დავითი 10 წლის გახდა, ოჯახთან ერთად ის სანქტ-პეტერბურგში საცხოვრებლად გადავიდა, სადაც მან კუსტოდიევის სახელობის სამხატვრო სკოლა წითელ დიპლომზე დაამთავრა. ამის შემდეგ სწავლა სანქტ-პეტერბურგის შტიგლიცის სახელობის სამხატვრო-სამრეწველო აკადემიაში განაგრძო. დიზაინერი, რუსეთის ჩრდილოეთ დედაქალაქში მოწყობილი სადებიუტო ჩვენების მომენტისთვის 15 წლის გახლდათ. რუსეთში წარმატებების მიუხედავად, დავიდ კომამ ოცნება ლონდონში გადასვლის შემდეგ აისრულა და სასწავლებლად წმიდა მარტინის სახელობის ხელოვნებისა და დიზაინის ცენტრალურ კოლეჯში შევიდა. მისი გამოსაშვები ნამუშევარი კურსზე საუკეთესო გამოდგა და დავიდმა სწავლა მაგისტრის ხარისხის მოსაპოვებლად განაგრძო. 2013 წლის დეკემბერში დავიდ კომა მოდის სახლ Thierry Mugler-ის კრეატიულ დირექტორად დაინიშნა.

         გიორგი ქებურია თვითნასწავლი დიზაინერია, რომელმაც საკუთარი ხაზი 2010 წელს შექმნა. ის სურეალისტურ კოლექციას წარმოადგენს, რომელიც ფანტასტიკითა და უცხო კონცეფციით გაჯერებულია. მისით სამშობლოს გარეთაც უამრავი ვარკსკვლავი აღფრთოვანებულია.

           მისი დებიუტი Tbilisi Fashion Week– ზე ,,საუკეთესო ნიუქამერის“ წოდებით დაჯილდოვდა. 2 წლის შემდეგ კი მან საერთაშორისო ცნობადობა მოიპოვა კოლექციით “Bird Nest” და 2012 წელს Be Next –ის კონკურსში, თბილიში გაიმარჯვა, რასაც ქვეყნის ფარგლებს გარეთაც სხვა უამრავი წარმატება მოყვა. ამჟამად გიორგი ქებურია საკუთარ ხაზზე ორიენტირებულია და უწყვეტ რეჟიმში კოლექციებზე მუშაობს. იგი ცნობილია მოდის სამყაროს მიმდევრებისთვის მისი უნიკალური ხედვითა და ორიგინალური კოლექციებით, თუმცა ის რაც თითქმის ყველა ადამიანს ერთხელ მაინც უნახავს არის მისი დიზაინით შექმნილი კრეატიული ფორმის სათვალეები, რომელიც ჰოლივუდის ვარსკვლავებმაც მოირგო.

You either know fashion or you don’t.